कम्प्युटर अपरेटर पद खारेज नगर्न अध्ययनरत विद्यार्थीको माग

11 months  ago No Comment

सरकारले कम्प्युटर अपरेटर पद खारेज गर्ने गरी संघीय निजामती सेवा ऐनको मस्यौदा तयार पारेपछि त्यसविरुद्ध विद्यार्थीहरूले संघीय मामिला तथा सामान्य प्रशासन मन्त्री लालबाबु पण्डितलाई ज्ञापन पत्र बुझाएका छन् ।

‘२०७४ फागुन २७ गते नेपाल सरकारको ‘संगठन तथा व्यवस्थापन सर्वेक्षण समिति’को बैठकले नेपाल विविध सेवाअन्तर्गत प्राविधिक पदअन्तर्गत लोकसेवा आयोगबाट लिखित र प्रयोगात्मक परीक्षापश्चात् सिफारिस हुँदै आएको पद कम्प्युटर अपरेटरमा बहालवाला कर्मचारी अवकाश भएपछि स्थायी पद स्वतः खारेज हुनेछ र त्यस पदमा आवश्यकता अनुसार सेवा करारबाट पूर्ति गरिने निर्णय गरेपछि यसबारे गम्भीर ध्यानाकर्षण भएको र यसले वर्षाैंदेखि तयारी गरिरहेका विद्यार्थीलाई झस्काएको ज्ञापनपत्रमा भनिएको छ ।

कम्प्युटर अपरेटर पद खारेजीको निर्णयले भविष्यको उत्कृष्ट प्राविधिक जनशक्तिलाई सरकारी क्षेत्रमा प्रवेश गर्ने बाटो रोकेको र कम्प्युटर अपरेटरको तयारी गरिरहेकाको अवमूल्यन भएको तर्क गरिएको छ । लोकसेवामा कम्प्युटर अपरेटर पद स्वतः खारेज गरी परीक्षा र परीक्षणबिनै करारमा पदपूर्ति गरिएका कर्मचारीबाट कार्यसम्पादनमा ह्रास आउने दाबी विद्यार्थीहरुको छ ।

‘यो निर्णय सरकार तथा कर्मचारी प्रशासनको हितमा नभएकाले हामी सालिन भई निर्णय खारेजीको माग गर्दछौँ,’ ज्ञापन पत्रमा भनिएको छ । ज्ञापन पत्रको बोधार्थ निजामती कर्मचारी आधिकारिक ट्रेड युनियन, निजामती सेवामा ट्रेड युनियन, नेपाल निजामती कर्मचारी संगठन, नेपाल निजामती कर्मचारी युनियन (संघ) र नेपाल राष्ट्रिय कर्मचारी संगठनलाई पठाइएको छ ।

Do you like this article?

Comments are closed.