प्राथमिकतामा महिला : लोकसेवा तयारी कक्षा निःशुल्क

3 months  ago Ekantipur 3  Comments

बैतडी — पाटन नगरपालिकाले शुक्रबारदेखि महिलाका लागि निःशुल्क लोकसेवाका तयारी कक्षा सञ्चालन गरेको छ । कक्षामा हरेक वडाबाट ४ जना गरी सबै वडाका महिलालाई सहभागी गराइएको हो । केही विद्यालयलाई पनि नगरपालिकाले कोटा दिएको छ । ५५ जनालाई सहभागी गराइएको नगर प्रवक्ता लोकबहादुर भण्डारीले बताएका छन् । सरकारी सेवामा महिलाहरूको प्रवेश बढाउनका लागि कक्षाहरू सञ्चालन गरेको उनले बताए । यस क्षेत्रबाट अझै पनि सरकारी सेवामा प्रवेश पाउने महिलाहरूको संख्या न्यून रहेको छ ।

विभिन्न क्षेत्रका विषय विज्ञबाट प्रशिक्षण कक्षाहरू सञ्चालन गरिएको बताउँदै उनले भने, ‘हामीले बाटो देखाउने काम गरेका हौं,’ पालिकाभित्रका महिलाहरू सरकारी सेवामा प्रवेश गर्न सक्षम महिलाहरूको संख्या बढ्यो भने नगरकै उपलब्धि हुन्छ भन्ठानेर कार्यक्रम राखेको उनको भनाइ छ ।

लोकसेवाको तयारी गर्दा जान्नैपर्ने आधारभूत ज्ञान प्रदान गराउने उद्देश्यले १० दिनको कक्षा सञ्चालन गरिएको उपप्रमुख सरस्वती कोलीले बताइन् । उनले भनिन्, ‘१० दिनमा सक्षम हुन्छन् भन्ने हैन, तयारी कसरी गर्ने भन्नेबारे आधारभूत जानकारी पाउनेछन् ।’ महिलालाई लक्षित कार्यक्रम भए पनि पुरुषहरू पनि कक्षामा सहभागी छन् ।

खरिदार र नायब सुब्बाका कक्षा दिइरहेको नगरपालिकाले पाठ्यसामग्रीहरू पनि निःशुल्क प्रदान गरेको छ । तयारी कक्षाका सहभागीहरूलाई खाजा खर्चको समेत व्यवस्था पनि गरिएको छ । नजिक घर भएकाहरूलाई २ हजार र टाढाबाट आउनेहरूलाई ३५ सयका दरले खाजा खर्च दिने व्यवस्था गरिएको आयोजकले बताएका छन् । ६० भन्दा बढी कक्षाहरू दिइने योजना रहेको पालिकाले जनाएको छ ।

आफ्नै पालिकामा निःशुल्क रूपमा आयोगको तयारी गर्न पाउँदा खुसी लागेको वडा नम्बर ६ की सरस्वतीकुमारी साउदको भनाइ छ । घरमा बसेर केही थाहा नहुने बताउँदै उनले भनिन्, ‘अध्ययनको तरिका, परीक्षामा आउन सक्ने प्रश्नहरूबारे जानकारी कक्षाबाट प्राप्त भएको छ ।’

यसले सरकारी सेवामा प्रवेश गर्नमा केही राहत अवश्य पुग्ने उनले बताइन् । ‘घर छाडेर पढ्न नसक्नेहरूलाई आफ्नै गाउँठाउँमा सेवा लिन पाउँदा स्थानीय सरकार भएको अनुभूति गरेको वडा नम्बर ६ कै जानकी चन्दले बताइन् । उनले भनिन्, ‘महिलाहरूका लागि यो ठूलो अवसर ठानेका छौं ।’

Do you like this article?